ទោះជាត្រូវបង្ហូរឈាមក៏ធ្វើដែរឲ្យតែបានដីវត្តមកវិញ
01-June-2016 | ដោយ មែន កំសត់
ខេត្តកណ្តាល ៖ ទំនាស់ដីធ្លីរបស់វត្តដ៏រាំរ៉ៃមួយកន្លែងស្ថិតនៅក្នុងវត្តសំរោង ធំ ភូមិសំរោងក្អែ ឃុំសំរោងធំ ស្រុកកៀនស្វាយ ខេត្តកណ្តាល រវាងព្រះសង្ឃនិងពុទ្ធបរិស័ទចំណុះជើងវត្តជាង១០០អង្គ/នាក់មាន ក្តីក្តាំគ្នាជាមួយបុគ្គលបីបួននាក់រយៈពេលជាង១០ឆ្នាំហើយ ចាប់ពីសាលាដំបូងរហូតដល់ឧទ្ធណ៍ និងតុលាការកំពូល បានកាត់ក្តីឲ្យខាងភាគីព្រះសង្ឃនិងពុទ្ធបរិស័ទចំណុះជើងវត្ត ចាញ់ក្តី ។ ដោយទទូលរងនូវភាពអយុត្តិធម៌ជាទីបំផុតបែបនេះធ្វើឲ្យពូកគាត់កើត ទុកមិនសុខចិត្តបាននិមន្ត និងនាំគ្នាឡើងទៅតវ៉ានៅមុខតុលាការកំពូលកាលពីព្រឹកថ្ងៃទី៣១ ខែឧសភា ឆ្នាំ២០១៦ ដើម្បីស្វែងរកយុត្តិធម៌ ទាមទារយកដីរបស់វត្តមកទុកជាសម្បត្តិរួមវិញ ដាច់ខាតមិនឲ្យធ្លាក់លើដៃបុគ្គលឯកជនបីបួនអ្នកដែលជាទមិឡឥត សាសនាមិនស្គាល់បាបមិនស្គាល់បុណ្យឃុបឃិតគ្នាចង់យកដីវត្តទៅលក់ ឲ្យអ្នកមានលុយមានអំណាចឡើយ ។
លោក ប៉ែន ប៊ុនថា គណៈកម្មការវត្តសំរោងធំ មានប្រសាសន៏ថា ការនាំគ្នាទៅឈរនៅមុខបរិវេណតុលាការកំពូលនេះ គឺដើម្បីតវ៉ាទាមទារឲ្យតុលាការសម្រេចកាត់ក្តីឈរលើគោលការណ៍យត្តិ ធម៌ ខណៈដែលដីរបស់វត្តមានប្លង់រឹងត្រឹមត្រូវ ចេញដោយក្រសួងរៀបចំដែនដី នគរូបនីយកម្ម និងសំណង់ កាន់កាប់ដឹងឮជាសាធារណៈហើយ បែរជាតុលាការកំពូលកាត់ក្តីឲ្យវត្តចាញ់ក្តីទៅវិញ រីឯភាគីដែលចង់បានដីវត្តគ្មានឯកសារអ្វីទាំងអស់ ឈ្នះក្តីដោយអយុត្តិធម៌បំផុត ។
ប្រជាពលរដ្ឋចំណុះជើងវត្តជាច្រើនបានលើកឡើងដែរថា ដីវត្តនេះជាដីកម្មសិទ្ឋិរបស់វត្តពិតប្រាកដមែន ដែលបានកាន់កាប់ក្រោយឆ្នាំ១៩៩៤មកម្ល៉េះ និងបានធ្វើជាប្លង់កម្មសិទ្ឋិរបស់វត្តចាប់តាំងពីឆ្នាំ២០០៥ ហើយចាប់តាំងពីពេលនោះមកចាប់ផ្តើមដីមានហាងឆេង ស្រាប់តែមានបុគ្គលឈ្មោះ ឈុំ មុន្នី មកប្តឹងទាមទារយកដីវត្តដោយសំអាថា ជាដីរបស់អតីតសេនាជនភូមិដោយគ្មានហេតុផលនិងគ្មានឯកសារកាន់កាប់ អ្វីទាំងអស់ ហើយបែរជាតុលាការកំពូលកាត់ឲ្យវត្តចាញ់ក្តីទៅវិញ ។
ព្រះចៅអធិការវត្តសំរោងធំ ព្រះនាម យ៉ាន វណ្ណធឿន បានមានសង្ឃដីកាថា ករណីរឿងក្តីក្តាំដីវត្តជាង២ហិកតាជាមួយបុគ្គលឯកជននេះរយៈពេល១១ ឆ្នាំហើយ ដោយចូលទៅសាលាដំបូងខេត្តឲ្យវត្តចាញ់ក្តី រហូតមកដល់ព្រឹកនេះសាលាឧទ្ធណ៍កាត់ឲ្យវត្តចាញ់ក្តី និងប្រគល់ដីទៅឲ្យបុគ្គលឈ្មោះ ឈុំ មុន្នី នេះគឺជារឿងមិនប្រក្រតី ឬហៅថាជាអំពើពុករលួយ ដោយបុគ្គលឈ្មោះ ឈុំ មុន្នី មិនបានកាន់កាប់អាស្រ័យផលលើដីនោះទេ ចំណែកវត្តមានសាក្សីរស់ គឺប្រជាពលរដ្ឋនៅក្នុងភូមិ-ឃុំ និងមានដាំដើមឈើដុះច្រូងច្រាំង បែរជាតុលាការកំពូលកាត់ក្តីឲ្យវត្តចាញ់ដ៏អយុត្តិធម៌ទៅវិញ ។
ពាក់ព័ន្ធករណីខាងលើនេះ មិនអាចសុំការបំភ្លឺពីបុគ្គលឈ្មោះ ឈុំ មុន្នី ដែលជាភាគីឈ្នះក្តី និងចៅក្រមសម្រេចក្តីនោះទេ ។
ក្រុមប្រជាពលរដ្ឋដែលជាពុទ្ធបរិស័ទចំណុះជើងវត្ត និងព្រះសង្ឃគង់នៅក្នុងវត្តសំរោងធំ មិនសុខចិត្តទៅនឹងការសម្រេចក្តីនោះទេហើយថា នឹងតវ៉ាទាមទារស្វែងរកយុត្តិធម៌ទៅព្រះមហាក្សត្រ និងសម្តេចនាយករដ្ឋមន្ត្រី ឬស្ថាប័នពាក់ព័ន្ឋដ៏ទៃទៀត ដើម្បីឲ្យជួយអន្តរាគមន៍ផ្តល់យុត្តិធម៌ប្រគល់ដីនេះមកជាកម្មសិ ទ្ឋិរួមរបស់វត្តវិញ ហើយថា ទោះជាបង្ហូរឈាមក៏ត្រូវទាមទារដីនេះឲ្យបានមកជាសម្បត្តិរួមរបស់ វត្តវិញ ព្រោះបើបាត់ដី ព្រះសង្ឃ និងប្រជាពលរដ្ឋនឹងបាត់ផ្លូវនិមន្តឬដើរចុះទៅទន្លេគ្រាន់ដឹកទឹក យកមកប្រើប្រាស់មុជ ដាំស្ល និងដឹកសត្វគោចុះទៅលាងទឹកទន្លេ ជាពិសេសផ្លូវនេះសំខាន់ណាស់សម្រាប់ប្រជាពលរដ្ឋខេត្តព្រៃវែង និងខេត្តកណ្តាល ធ្វើការដឹកជញ្ជូនទំនិញ និងកសិផលផ្សេងៗទៅកាន់ទីផ្សារព្រោះជាចំណុចកំពង់ដរ ។
ប្រភពក្រៅផ្លូវការនិយាយថា ការដែលបុគ្គលឈ្មោះ ឈុំ មុន្នី ឃុបឃិតគ្នាចង់បានដីវត្តនេះ គឺដើម្បីយកទៅលក់ឲ្យឈ្មួញដីដ៏ធំមួយដែលមានក្រុមហ៊ុននៅជិតដី វត្ត ព្រោះសងខាងគេទិញអស់ហើយនៅស្ទះតែដីវត្តទេ ទើបថៅកែដីដ៏ធំដែលជាអ្នកមានលុយមានអំណាចក្នុងស្រុកខ្មែរនោះ ញុះញុងឈរនៅពីខាងក្រោយខ្នង ហេតុដូច្នេះទើបអស់លោកតុលាការគ្រប់ថ្នាក់កាត់ឲ្យភាគីខាងវត្ត ចាញ់ក្តីដោយអយុត្តិធម៌ ៕
ចំនួនអ្នកទស្សនា
- ថ្ងៃនេះ1481
- ម្សិលមិញ3511
- សប្តាហ៍នេះ14131
- ខែនេះ239801
- ឆ្នាំនេះ239801
- សរុប20682257